Të nderuar Prindër,

është dëshira jonë e përbashkët që fëmijët tanë, të cilët janë ardhmëria jonë, të gëzojnë një arsim të mirë dhe të bëhen bashkëqytetarë të suksesshëm dhe të përgjegjshëm.

Në mënyrë që fëmijët tanë të jenë të suksesshëm në shkollat ku ata ndjekin mësimin e rregullt, ata duhet të zotërojnë gjermanishten në një nivel të përparuar. Fëmijët të cilët nuk e njohin mirë gjuhën shqipe, e kanë shumë të vështirë të mësojnë mire gjuhen gjermane. Në një shoqëri multikulturore, fëmijët që mësojnë vetëm gjermanisht ose vetëm shqip, janë fatkeqësisht të njëanshëm. Suksesi shkollor i fëmijëve dygjuhsor, që marrin pjesë në mësimin plotësues në gjuhën shqipe dhe në të njëjtën kohë mësojnë edhe gjermanisht edhe shqip, është në një nivel shumë më të lartë se sa i fëmijëve njëgjuhësor. Gjithashtu është e vërtetuar që, fëmijët që rriten në dy gjuhë dhe dy kultura, janë më tolerantë në jetën e tyre shoqërore dhe aftësitë e tyre janë më të theksuara në jetën e tyre të përditshme dhe të përbashkët.

Që nga viti shkollor 2017/2018, LAPSH Bavari e.V. në bashkëpunim me ministrinë e shtetit Bavarez për arsim dhe kulturë si dhe në përkrahje dhe mbështeje të Konsullatave të Përgjithshme të republikës së Shqipërisë dhe asaj të Kosovës, organizon dhe menagjon mësimin plotësues në gjuhën Shqipe në shkollat fillore, të mesme dhe gjimnaze në Bavari. Mësimi plotësues mbahet  nga mësues të diplomuar dhe të vërtetuar nga Ministritë përkatëse të Arsimit dhe diasporës.

Pjesëmarrja në këtë mësim plotësues, i cili zhvillohet jashtë mësimit të detyrueshëm në sistemin shkollor gjerman, mvaret nga kërkesa e prindërve. Në varësi të llojit të shkollës, nxënësit që marrin pjesë rregullisht në shkollën shqipe, në fund të vitit shkollor marrin një mirnjohje që kanë vijuar mesimin plotësues në gjuhën shqipe, ose në çertifikatat e tyre shënohet që ata kanë marrë pjesë në mësimin plotësues në gjuhën shqipe.

Që mësimi plotësues në gjuhën dhe kulturën shqipe të mund të zhvillohet, duhet së paku 12 prindër të paraqesin një kërkesë në administratën e shkollës në të cilën mësojnë fëmijët e tyre. Aplikimi, i cili ka për qëllim kërkesën për të marrë pjesë në mësimin plotësues shqip, jepet nga administrata e shkollës. Ju gjithashtu mund të merrni kërkesën nga mësuesit shqiptarë, shoqatat e prindërve shqiptare, ose mund ta shkarkoni nga faqja e internetit të LAPSH Bavari e.V.

Nëse, në shkollën ku fëmija juaj vijon mësimin, numri i aplikimeve nuk është i mjaftueshëm, atëherë ju mund të regjistroni fëmijën tuaj në një shkollë tjetër në zonën që ofron mësim plotësues në gjuhën shqipe.

Vendosni që sot për një të ardhme më të mirë për fëmijët tuaj! Dorëzoni kërkesën për mësimin plotësues në gjuhën shqipe në administratën e shkollës së fëmijës tuaj dhe ofroni atyre mundësinë për të mësuar gjuhën e ëmbel shqipe, gjuhën e prindërve dhe baballarëve të tyre.

Me nderime të sinçerta,

Milazim Ukaj

Kryetar i LAPSH-it për Bavari